الاثنين، 3 ديسمبر 2012

اغنية اصحى يامرسى وصحى النوم



اصحى يا مرسي بلاش تهجيص.. احنا زهقنا من الترقيص
مشروع نهضة طلع فنكوش.. وال100 يوم كانوا حلق حوش
100 يوم خلوا العيشة تيت.. مرسي بييجي مصر ترانزيت
بيبي بيب بيب.. ميت يوم مش لاقيين أنابيب
الأنبوبة بـ 100 جنيه.. الغلابة هيعملوا ايه
والبنزين وألا السولار.. الطوابير من الدار للنار
غني علينا بناي وكمنجة.. قال البامية وقال عالمانجة
يا مرسي في بيتكوا بتطبخوا ايه.. 100 يوم قوطة بـ 10 جنيه
يا مرسي في بيتكوا بتشووا فراخ.. 100 يوم عيش دوخنا وداخ
يا مرسي في بيتكوا بتعملوا لحمة.. 100 يوم عدوا ما شفنا الرحمة
حد أدنى للأجور.. مطلب ثوار مع جمهور
مرسي يا مرسي يا مرسي يا مرسي.. يا العدالة يا إما الكرسي
اجكي يا مرسي على المرور.. لف يا مرسي علينا ودور
لا ولا ولا لا ولا.. احكي يا مرسي على الزبالة
واحكي كمان عن سينا كتير.. ع لإرهاب وعن التهجير
قال حيجيب حق التحرير.. كرم عنان والمشير
قال حيوزان التأسيسية.. 100 يوم عدوا خيبة قوية
قال هيهيكل الداخلية.. والداخلية هي هي
قال حيجيب ديمقراطية.. ساب جماعته مش قانونية
قال جاي يحكم باسم الدين..ساب اخواتنا في الزنازين
قال حيجيبلنا هيبة الدولة.. 100 يوم شايفين خيبة الدولة
قال مش جاي بقميص وحراسة.. ناقص يمشي معاه قناصة
الجرافيتي والنبي دانيال.. ال100 يوم خلو العيشة شمال
أخون أخون فيها كمان.. 100 يوم بيعين أخوان
حقق في محمد محمود.. حق اخواتنا أكيد حيعود
القصر العيني وفي ماسبيرو .. القصاص ومفيش حاجة غيرة
حق الألتراس راجع راجع.. 100 يوم عدوا ألم ومواجع
ثورة وقامت للحرية والعدالة الاجتماعية
أنا مش خايف زي زمان.. لسه الثورة في كل مكان
لو ضربونا في الشوارع.. صوت الثورة طالع طالع
لو مسكونا في البيوت.. برده الثورة مش هتموت
علي في سور السجن وعلي.. بكره الثورة تشل ما تخلي
علي يا مرسي كمان وكمان.. بكره نشيل والزور حيبان

ليست هناك تعليقات:

إرسال تعليق